Joh 20 | MMX | STEP | No mene maxantamak suubu at laaleng avot ap mo luik, lavanga move gak lok main. Ne Maria Magdalene gat pas uto at lamaaut la ga ven i do leventaba diga xuvun pes pam luat boro at lungusungus at lamaaut.

John 20

Iesu Ga Roo Xat Amlong At Lanmet

(Mt 28:1-8; Mk 16:1-8; Lu 24:1-12)

1 No mene maxantamak suubu at laaleng avot ap mo luik, lavanga move gak lok main. Ne Maria Magdalene gat pas uto at lamaaut la ga ven i do leventaba diga xuvun pes pam luat boro at lungusungus at lamaaut. 2 Ni ga sixit kaxat la ga vosiga ne Simon Pita la lara laradi loklok ka anasa bok, ne Iesu ga vavara aleng tin, la ga lok tidu xeretna, “Dira lok ka vam Leeme Silok boro at lamaaut la dik dixoklen i do di lok li i ua.”

3 La ne Pita mi mo lara laradi loklok ka anasa duga vas kaxat uto at lamaaut. 4 La dugak sixit, ketla mo lara laradi loklok ka anasa ga sixit polo ne Pita la ga vot avot to at lamaaut. 5 Ni ga rikbu si ukopok la ga ven lenbantamon mikmit tongan, ketla ni goxo vubeles ukeneng. 6 Ga melemu ren ne Simon Pita, la ni ga vubeles epolo ukeneng at lamaaut. Ni ga ven lenbantamon mikmit tongan gak midi go, 7 la mo loxontamon diga vaxais kangkan lavatlak at ne Iesu min, goxok midi eburu mi lenbantamon mikmit tongan, ketla ga repes pam la gak midi at lenep petpes. 8 Melemu mo lara laradi loklok ka anasa, mo ga rupot avot to at lamaaut, neni bok ga vubeles ukeneng la ni ga ven i la ga nuunu do ne Iesu ga roo xat pam. 9 Du goxovisi xasep at levelinga at Lovoang Kaala, ga tong i do neni naba roo xat amlong bok basinge lanmet. 10 Melemu dugamlong uto xolonu.

Iesu Ga Ru Asuvos Ti Ne Maria Magdalene

(Mt 28:9-10; Mk 16:9-11)

11 Maria mo ga tu go maxamang at lamaaut; neni gang teng, la ga rikbu beles ukeneng at lamaaut, 12 la ga ven luangelo go, duga siga levempanga bunbun, la dugat kis at lenep labantuxu at ne Iesu gak midi e; lara ro at lavatlak la lara ro at luxangkedek.

13 La duga sue i, “Latkin, ung teng atla?”

La ni ga lok, “Di lok ka vam Leeme Silok tarak uto, la axoklen i do di lok li i ua.” 14 Se neni ga vaase axav i na, neni ga rem gili la ga ven ne Iesu ga tu go; ketla neni goxoklen i do neni ne Iesu.

15 Iesu ga sue i, “Latkin, ung tingis lai? La nege mo nu u reven pupuke rin?”

Maria ga nua i do, neni laradi loklok tatao ap mo laraamang; kuren la neni ga lok tin, “Mo do ura lok ka vam i uto, tong axasev ia do u lok li i ua, la abat pas la ana lok ka i.”

16 Iesu ga lok tin, “Maria.”

La ne Maria ga rem gili la ga vaase mi lavapaase Ibru, “Raboni.” Lavasuun teren keretna, leeme loklox ase.

17 Iesu ga lok tin, “Nemen uta ranga tu rak, mila a xovisi ana onon uto vana at ne Tamak. Ketla una vosiga luvutnetak la una tong i ridi do anamlong be uto at ne Tamak, neni ne Temen nimi bok, Moroa rak, neni ne Moroa box atnimi.” 18 La ne Maria Magdalene ga onon la ga tong i ri luvuttadi loklok ka anasa do neni ga ven pam Leeme Silok la ga tong levelinga at ne Iesu ridi.

Iesu Ga Vot Saxaven Ti Luvuttadi Loklok Ka Anasa Ren

(Mt 28:16-20; Mk 16:14-18; Lu 24:36-49)

19 Ga ukantinao at laaleng avot ap mo luik luvuttadi loklok ka anasa digak lox eburu ro xeneng at lara loogu la diga soxoba pe axap levenmusaragu mila diga e amarat at luvuttadi amgomgo. La ne Iesu ga vot la ga ru go xantubu atdi, la ga lok, “Limila nak lox eburu minimi.” 20 Melemu at levelinga ren, neni ga vaxase luvuttadi loklok ka anasa ren mi lukngen la labangbaangis teren. La diga umsu mi lomomo ap mo loxonaleng diga ven Leeme Silok.

21 La ne Iesu ga lox amu manga ridi, “Limila nak lox eburu minimi. Ne Tamak ga riki ia, kuren la nenia bok, ana riki nimi.” 22 La ni ga mas asu lamamas teren tidi la ga lok tidi, “Mina lok kaka Loroonan Kaala. 23 Do mina doxoma xepe leveloklok kakapmek at tara, i lok ngan ne Moroa i doxoma xepe i. Do mixo doxoma xepe leveloklok kakapmek at tara, i lok ngan ne Moroa xopmen na doxoma xepe i.”

Iesu Ga Ru Asuvos Ti Ne Tomas

24 Tomas, laasen bok teren ne Didimas, neni lara at lasangaun mi legepura luvuttadi loklok ka anasa at ne Iesu. Neni goxok lox eburu mi luvuttadi loklok ka anasa ap mo laaleng ne Iesu ga vot pasa di. 25 Diga tong i rin do diga ven Leeme Silok la ni ga lok tidi keretna, “Do a noxo ven levenin kooxing at lukngen la ana long tu ren la na long tu bok at labangbaangis teren, nenia a noxo nuunu do neni ga roo xat amlong basinge lanmet.”

26 Melemu at lavanuti aleng, luvuttadi loklok ka anasa diga nemen manga ap mo loogu, Tomas bok mo gak lok. La diga soxoba pe axap levenmusaragu, ketla ne Iesu ga vot la ga ru xantubu atdi la ga lok tidi xeretna, “Limila na nemen eburu minimi.” 27 La ni ga lok ti ne Tomas, “Una long tu de, una ven lukngak. Una song asu mi lakngam la una long tu at labangbaangis tarak. Nemen lodoxoma ram na sixit ekarakat, ketla una nuunu rak.”

28 La ne Tomas ga lok tin, “Nenu Leeme Silok tarak la lo Moroa rak.”

29 La ne Iesu ga lok tin, “Ura ven pam ia, kuren la u nuunu rak. Luvukat bak lok tinedi di xovisi na ven ia, ketla di nuunu rak.”

30 Iesu ga lok buaang levempanga sangsangu ro melamgo at luvuttadi loklok ka anasa ren, la levelinga ren kopmen nak lok at na lubuk. 31 Ketla leventaba levempanga sangsangu ik lok at na lubuk kusu mina nuunu do ne Iesu neni Lanarong la Nitna ne Moroa; la do mina nuunu ren, miba ruuna ka lorooro avolo at laasen teren.